PH.D.-NNGORNIARFIK LISIMATUSARFIK 2001-IMIILLI periarfissaqarsimavoq issittoq pillugu ilinniakkani ukiuni pingasuni ph.d.-nngorniarfimmik neqerooruteqartarnissamut. Ph.d.nngorniartoqarsinnaavoq sammisani pingasuni ukunani: • pædagogikkimi ilinniakkanillu ilisimatusarnermi • peqqissutsimut inuiaqatigiinnilu atukkanut tunngasuni • kulturimi, oqaatsini inuiaqatigiinnilu atukkani Ph.d.-nngortoqartarpoq nunani tamalaani doktoritut gradit naligalugit, ullumikkullu Nunatsinni ilinniagarineqarsinnaasut qaffasinnerpaartaraat. 2001-imiilli Ilisimatusarfimmi ph.d.-nngorniartartut amerliartuinnarsimapput. Maannamut inuit katillugit 19-it Ilisimatusarfimmi ph.d.-gradeqalersimapput – ullumikkut ph.d.-nngorniat 30-kkaarlutik allatsittarput. Ilisimatusarfimmi ph.d.-nngorniatut allatsikkumalluni kandidatitut ilinniarsimanissaq pisariaqarpoq. Aammattaaq ph.d.nngorniutiginiakkamut nassuiaammik nassiussisoqartassaaq ph.d.nngorniarfimmit akuerineqartussamik suliniutiginiakkallu aningaasaliiffigineqarnissaa aaqqinneqareersimasassalluni. I Ph.d.-nngorniarfimmi pingaartinneqarpoq ph.d.nngorniap namminersorluni ilisimatuutut misissuisinnaassusianik – tassa misissuisinnaassutsimik, paasinnissinnaassutsimik, nammineerluni suliarinnissinnaassutsimik ilisimatusarnermilu ajornartorsiutit qanoq issusiinik ingerlatitseqqiisinnaassutsimik – ineriartortitsinissaq. Ilinniagaq ilinniartut sammisami tamatumani ilisimatuutut misissueriaatsinik teoriinillu ilisimaarinnillualissutigissavaat. Tamanna iluaqutigalugu ph.d.nngorniarfik namminersorluni ilisimatuutut misissuinissamut, ineriartortitsinissamut ilinniartitsinissamullu piginnaanngorsaassaaq. Ilinniarnerup nalaani ilinniartoq nammineerluni ilisimatuutut suliniuteqassaaq ph.d.nngorniutigisarlu aallaavigalugu ilisimatuutut allaatigisaqassalluni. Ilinniartoq aamma ph.d.-mi pikkorissaqataasassaaq 30 ECTS pointit nalingannut (ukiup affaani pikkorissarneq) ilinniartitsinerlu ilisimasanillu ingerlatitseqqeeriaatsit allat ilisimasaqarfigilissallugit. Ilinniartoq Ilisimatusarfimmi ilisimatuutut misissueqataasassaaq aammalu nunami allami ilisimatusarfimmiissalluni. Ph.d.nngorniarneq naggaserneqassaaq ilisimatuutut allaatigisamik naliliinermik, akuerineqareerpallu nunani tamalaani naliliisartunut oqaluttariarsorluni illersorneqassaaq. Ilisimatusarfiup ph.d.-nngorniarfiani ph.d.-nngorniarfigineqarsinnaasut assigiinngitsunik sivisussusillit marluk neqeroorutigineqarput: • Ph.d.-nngorniarneq nalinginnaasoq (ukiunik pingasunik sivisussusilik) • Adjunktitut ph.d.-nngorniarneq (ukiunik arfinilinnik sivisussusilik) Ilisimatusarfimmi ph.d.-nngorniutillit assigiinngitsorpassuarnik sammisaqarput – tamarmik pissutsit Kalaallit Nunaanni inuiaqatigiinnut pingaarutillit ilisimatusarfiginissaannik siunertaqarlutik. Quppernerni tulliuttuni massakkorpiaq ph.d.-nngorniat ph.d.-gradeqalersimasullu nalunaarsorsimaffiat takusinnaavat. www.uni.gl 75
76 Publizr Home