AATSAAT TAAMA ATORLUAGAQARSINNAATIGAANGA - SUUT TAMARMIK ISSITTUMUT TUNNGASUUPPUT Tukumminnguaq N. Olsen West Nordic Studies-imi ilisimatusartuuvoq. Meeraallunili naggueqatini Inuit tikeraarusuttarsimavai - Issittumilu atugassarititaasunik allannguerusussuseqartuaannarsimalluni. Taamaattumik naleqqulluarpoq taanna UArcticimi attaveqartarfipput aqqutigalugu University of Alaska Fairbanksimi (UAF) tikeraatut ilinnialernissaminut akuerisaammat. Tassani naggueqatini Inuit nunallu inoqqaavi allat naapissinnaasimavai Department of Alaska Native Studies & Rural Developmentimilu soqutigisaminut aallulluakkaminut naleqquttunik Rural Developmentimi ilisimatusarsinnaasimalluni. ” UAF-mi semesterimi ataatsimi ilisimatusarpunga, tupaallaatigaaralu professorikka tamarmik - ataaseq eqqaassanngikkaanni - nunat inoqqaaqatigigatsigit. Nunatsinni ilinniarnera tamaat kalaallimik ataasiinnarmik ilinniartitsisoqarnikuuvunga. Taamaattumik UAF-imi periarfissarsivunga nammineq isiginnittaaserput atorlugu ilisimatusarsinnaallunga Europamiut isiginnittariaasiat kisimi atornagu. Tamanna pingaaruteqarluinnarsoraara nammineq nunap inoqqaavisut Issittormiuusutut ilisimatusarfimmi ilinniartutut isiginnittariaatsit assigiinngitsut atorlugit ilisimatusarnissaq. Taamaattumik UAF-imi semesterimi ilisimatusarninni inuttut ineriartuinnarnanga aamma ilisimatusarnikkut iluaqutigilluarpara. Tukumminnguup UAF-imiinnini nunap inoqqaavi pillugit soqutigisaqarnerulissutigalugulu aallussinerulissutigaa - taamaattumillu aamma maanna ilinniarnermi saniatigut Inuit Circumpolar Councilimi piffissaq tamaat sullissivoq. Namminerlu aalajangiisuusinnaaguni inuunermi sinnerani tamatuminnga suliaqarusuppoq. ” ICC-mi sulilernissaq kissaatigiuarsimavara - inuuneralu naallugu maani sulerusuppunga. Inuimmi inuunerminni atugaannik nunallu inoqqaavisa pisinnaatitaaffiinik pitsanngorsaanermik sulissutiginninneq aallukkusutarilluinnarakku. SULI ANGUSAQARUSUNNERULERPUNGA Eva Luusi M.-Mølgaard Inuiaat Kulturiannik Oqaluttuarisaanerannillu ilinniarpoq – naleqquttumik asannittumilli kajumissaarneqarnermigut Dartmouth Collegeimi ilinniarnissaminut qinnuteqarpoq suleqatigiinnissamik isumaqatigiissuterput aqqutigalugu tikeraartutut ilinnialernissaminut akuerisaalluni. Eva Dartmouth College-imiinnermini Native American Studies-imi pikkorissarpoq. Evap taakku pikkorissarfigai nunap inuiinik soqutigisaqarluarami. Eva iluanaarpoq pikkorissartitsisut tassaammata Amerikami nunap inuii. ” USA-mi, Alaskami Hawaiimilu, nunap inuii sunik nalaataqarsimanersut – sulilu sunik akiugaqarnersut – ilisimasaqarfigilerpara. Pikkorissarnerit aqqutigalugit uppernarsivara nunat nunasiaasimasut, ilaatigut Kalaallit Nunaat, nunasiaajunnaariartornermi suleriaatsinik ammanerusumik oqallisiginninnissartik pisariaqartikkaat. Eva campusimi Native American House-imi peqataalluartarpoq, tassanilu nunap inuiinik soqutiginartunik amerlasuunik naapitsivoq. Inuit taakku ullumikkumut suli puiunaatsippai. ” Professorit Native American Studies-imeersut maligassatut isigaakka aamma taakku namminneq kultureqarlutillu oqaaseqaramik universitetimi atunngisaminnik – allamilli kultureqarlutillu oqaaseqarnerat malunnarpoq, taakkualu suli angusaqarusunnerulersippaannga. Professoriinnaanngitsoq puiunaapput. Aamma ilinniartorpassuaqarpoq USA-mi tamarmi naggueqatigiinnit assigiinngitsorpassuarneersunik sapaatip-akunneranut arlaleriarlutik Native American Houseimi aaqqissuussanut naapisimaariartortartunik. Tassani tikilluaqqusaasutut misigisarpunga isumaqatigisannillu naapitaqartarlunga. Ilisimatusarfimmiileqqissimallutik Tukumminnguaq Evalu isumaqatigiillutik ima oqarsinnaapput: Nunanut allanut ilinniariarneq pissarsiaqarluarnaqaaq. Soorunami sulianut tunngasunik ilikkagarpassuaqarnarpoq – immaqalu suli pingaaruteqarnerusumik inuttut ineriartorfiungaatsiarpoq, akuersiinnarnani apeqqusiisinnaanerulernarpoq namminerlu inuiaqatinut iluaqutaarusunnerulernarluni. Nunanut allanut ilinniariarsimareerlutik siunissaat tunngavilerneqapajaareerput: Tukumminnguaq inuunini naallugu ICC-mik sullisserusuppoq, Evap Ilisimatusarfiup ph.d.-nngorniarfiani ilinniarnissamut akuerisaanissani sulissutigerusuppaa, tassanilu Kalaallit Nunaanni eqqarsartaatsikkut nunasiaajunnaariartorneq sammissallugu. www.uni.gl 55
56 Publizr Home