A AANEQ A ALLARNISAANEQ NUTAALIORNERLU Kalaallit Nunaanni inuiaqatigiinnik ineriartortitsinissamut siuariartortitsinissamullu tunngatillugu pingaarutilittut eqqaaneqarajupput. Amerlanertigut oqaatsit taakku suliffeqarfimmik nammineq aallartitsinermut tunngatillugu atorneqartarput – aallarnisaaneq namminersortunngornerinnaanngitsoq. Taamaattumik aallarnisaaneq pillugu ilisimasaqarnerulertoqarnissaa ilinniakkallu eqqarsaatigalugit periutsinik ineriartortitsisoqarnissaa pingaaruteqarluinnarpoq. Inuussutissarsiornermi Aningaasarsiornermi bachelorinngorniarfitsinni ilinniartitsinermi aallarnisaaneq suli pingaarteqaarput paasinarsisimammat ilinniartunut arlalitsigut sunniuteqarluarsimasoq. Ilinniartitseriaatsit aallarnisaanermik tunngavillit kissaatiginartunik arlalinnik pingaaruteqangaartunillu piginnaaneqalersitsisarput. Isumassarsianik nutaanik ineriartortitsinerullunilu naliliinerullunilu piukkunnarsaaneruvoq – kingornalu isumassarsianik piviusunngortitsinerulluni. Piginnaasat taakku inuussutissarsiornerup iluani, assersuutigalugu nunarsuarmi nungusaataanngitsumik piorsaanermut Naalagaaffiit Peqatigiit anguniagaannik piviusunngortitsiniaanermi, pingaaruteqarluinnarput. Kalaallit Nunaanni erhvervsøkonominngortut inuussutissarsiornermi aningaasaqarnermut tunngatillugu sakkussatik paasisimasaqarfigilluassavaat ilisimatuutullu misissukkat kingullerpaat malinnaavigissallugit. Suleqateqarsinnaassuseq aamma suleqatit najukkanilu innuttaaqatigiit peqatigalugit aaqqiissutissanik nutaanik pissutsinullu naleqquttunik ineriartortitsisinnaassusertulli pingaaruteqartigaaq. Pissutsit taakkununnga assingusut fagini allani soorunami aamma atuupput. Taamaattumik siunertaqarluartassaaq aallarnisaaneq fagini allanittaaq ilinniartitsinermi atortaraanni. Aallarnisaaneq isumassarsiorsinnaanermut, nutaaliorsinnaanermut iliuuseqarsinnaassusermullu tunnganeruvoq suliffeqarfimmik nammineq qanoq pilersitsisoqartarneranut tunnganerunani. Ukiuni kingullerni ilinniartitsinermi aallarnisaanermik pingaartitsisoqartarneranit erserpoq ilinniartut kajumissuseqarnerulerlutillu piumassuseqarnerulertartut ajornartorsiutinik pissutsini piviusuni atuussinnaasunik – allanik peqateqarlutik aaqqittariaqartutut paasisaminnik – suliaqaraangamik. Paasinarsisimavortaaq suliami toqqissisimanerulerlunilu imminut tatiginerulertoqartartoq namminerlu piginnaasanik tutsuiginninnerusoqalertartoq sammisani assigiinngitsuni pikkoriffigineqartut ataatsimut atorneqaraangata soqutigisaqaqatillu suleqatigineqaraangata. Taamaalilluni ilinniartitsinermi aallarnisaaneq ilinniarnermi iluaqutigineqarnerusinnaavoq ilinniakkamillu naammassinnereerluni sulilernissamut piareersarnermik pitsanngorsaasinnaalluni. www.uni.gl 39
40 Publizr Home