S SISSUINEQ I • • Inatsisilerinermut Immikkoortortaq Issittumi Inuiaqatigiilerinermik Aningaasaqarnermillu Ilisimatusarnermut Immikkoortortaq • Isumaginninnermik Suliaqarnermi Immikkoortortaq • Tusagassiornermut Immikkoortortaq Katillugit 20-ngajannik piffissaq tamaat sulisoqarpoq ilisimatuunillu 20-t missaanniittunik assigiinngitsutigut attaveqartartoqarluni. Tamatuma saniatigut ilinniartitsisorpaaloqarpugut – maanimiuusunik nunanillu tamalaaneersunik. Ilisimatusarfiup sulissutigiuarpaa ilisimatuutut misissuinermik ineriartortitsinissani ilisimatuutullu misissukkat tunngavigalugit ilinniartitsinermik suli ineriartortitsinerulernissani. Periusissanik ineriartortitsinerup ilaatut ilisimatusarfik ilisimatuutut misissueqatigiinnik marlunnik pilersitsiniarnialerpoq ilisimatuutut misissuinerni suleqatigiittoqarnerulersitsiniarlutik toraagaqar nerulersitsiniarlutillu. Ullumikkut isumaginninnermut isumaginninnermullu politikkimut tunngatillugu inuiaqatigiinni akiuussinnaassusermi, piitsuussusermi angerlarsimaffeqannginnermilu, nammineersinnaajunnaarsitsinermi parnaarussallu atugaanni ilisimatuutut misissuisoqarpoq. Erseqqippoq isumaginninnermut politikkimi ilisimatuutut misissuinermik aaqqissuussisoqartariaqartoq, ilaatigut meeqqat inuusuttullu pillugit ilisimatuutut misissuinermik, taakkulu pillugit misissuisoqarpoq inuusuttut ilarpassui tunngaviusunik atuarfimmi piginnaasaqalerneq ajormata – ilinniakkanik unitsitsisut amerlangaatsiartarneranik kinguneqartumik. Massakkorpiaq meeqqat atuarfiini ilisimatuutut misissuisoqarpoq, ilisimatuutulli misissuineq tamanna meeqqat inuusuttullu inuunerannittaaq misissuininngortinneratigut siammasinnerutilerusupparput. Tamanna ilaatigut inuusuttuaqqat aalajangikkaminnut kajumississutigisaannut, ilinniagarerusutaannut, najugarerusutaannut kinaassusererusutaannullu tunngavoq. Uagut nammineq ilisimatusarfitsinnittaaq ilinniakkanik unitsitsiinnartarnernik inuusuttullu ilinniakkamittut toqqartagaannik paasinnilluarnerorusuppugut ilinniartitseriaatsitsinnillu ineriartortitserusulluta inuit ataasiakkaat ilinniarnerannik pitsanngorsaajumalluta ilinniakkanillu unitsitsisarnernik ikilisaarusulluta. Naalagaaffiit pissusiinik ilisimatusarnermi politikkikkut partiit Nunatsinnilu politikkikkut ineriartorneq ilisimatuutut misissuiffigineqarput – aamma inuiaqatigiinni inukitsuni tusagassiorneq tusagassiuutillu kalaallisuut ilisimatuutut misissuiffigineqarputtaaq. Ukiuni kingulliunerusuni naalagaaffeqatigiinneq nunarsuarmilu sumiiffinni politikkikkut ilungersunartut ilisimatuutut mi sissugassanngortinneqarsimapput. Taamaattumik Kalaallit Nunaata nunanut tamalaanut attaveqarnera, tassa EU-mut attaveqarneq, Avannaamioqatigiit killiit soorunamilu namminersorneruleriartornerup tungaanut ineriartorneq ilisimatuutut misissuivigineqarput. Ineriartorneq tamanna eqqarsaatigalugu Kalaallit Nunaanni demokratiimut tunngasut allarpaaluit ilisimatuutut misissuivigineqartariaqarput. Aningaasaqarnermut tunngatillugu aningaasaqarnermi oqaluttuarisaaneq, qeqertani inuiaqatigiinni aningaasaqarneq, aallarnisaaneq Nunatsinnilu peqatigiiffinnik suliffeqarfinnillu aqutsineq ilisimatuutut misissuiffigineqarput. Pinngortitap pisuussutaanut, tassa uuliamut, gassimut aatsitassanullu, tunngatillugu suliniuterpaaloqarsimavoq, pingaaruteqarluinnartulli soorlu aalisarneq takornariaqarnerlu suli ilisimatuutut misissuivigineqarsimanngillat. Inatsisilerinermut tunngasunik ilisimatuutut misissuisoqarpiarsimanngilaq, naatsorsuutigineqarporli inatsisilerinermut immikkoortortami nutaami eqqartuussiveqarnermik ilisimatusartoqarnerulerumaartoq taamalu Nunatsinni eqqartuussiveqarneq Nunattalu nunani tamalaani eqqartuussiveqarnermut naleqqiullugu qanoq inissisimaneranik ilisimasaqartoqarnerulerluni. NUIAQATIGIILERINERMIK, ANINGAASAQARNERMIK TUSAGASSIORNERMILLU ILISIMATUSARFIK TALLIMANIK immikkoortortaqarpoq: www.uni.gl 35
36 Publizr Home