inuttut imminut unammillerfigisinnaasat inunnullu allanut attaveqarfigisinnaasat. Kalaallit Nunaanni isumaginninnermut siunnersortissaaleqisoqaqaaq. Taamaattumik ukua suliffissarsiorfiginissaannut periarfissaqarluarputit: • Pisortaqarfiit – ilaatigut Namminersorlutik Oqartussat kommunillu • Pinerluttunik isumaginnittoqarfik • Napparsimaveqarfik • Isumaginninnermik suliffeqarfiit soqutigisaqarfiillu namminersortunit pigineqartut OQAASILERINEQ, ATUAKKIALERINEQ TUSAGASSIUUTILERINERLU Kalaallit oqaatsivut soqutigisaraagit, aamma oqaasileralutillu atuakkialeralutillu tusagassiuutilererusussinnaavit? Oqaasilerinermik, atuakkialerinermik tusagassiuutilerinermillu ilinniagaqarnikkut oqaatsit sannaannik oqaatsillu nunap kulturikkut pissutsinut pingaaruteqassusiannik ilisimasaqarlualissaatit. Soorlu oqaatsit atuakkianut tusagassiuutinullu pingaaruteqangaartut, taamatuttaaq nutaarsiassat, oqallisigisat kulturillu ingerlateqqinneqartarnerannut pingaaruteqangaarput. Taamaattumik Oqaasilerinermik, Atuakkialerinermik Tusagassiuutilerinermillu ilinniagaqarnikkut kulturimi pisut akuuffigissavatit – inuiaqatigiinnilu pisut pingaaruteqarnerpaartaasa ilaannik malinnaaviginninnissat ilinniassavat. Ilinniagaq bachelorinngorniarfiusinnaavoq (ukiuni pingasuni) kandidatinngorniarfiusinnaallunilu (ukiuni marlunni). Oqaasilerinermik, atuakkialerinermik tusagassiuutilerinermillu ilinniagaqarsimallutit makku suliarisinnaavatit: • Ilinniarnertuunngorniarfinni seminarianilu ilinniartitsisuuneq • Oqaasileriffik • Pisortat ingerlatsivii • Atuakkanik naqiterisitsisarfiit kulturimillu suliaqarfiit allat • Radio & TV • Qaffasinnerusumik ilinniarfinni ilinniartitsineq ilisimatuutullu misissuineq PEQQISSAASOQ Peqqinneq soqutigisaraajuk, aamma innuttaasut napparsimasut peqqisseqqinnissaannut ikiorusuppigit? Peqqissaasut peqqinnissaqarfimmi assigiinngitsorpassuarnik immikkoortortalimmi meeqqanik, inuusuttunik, inersimasunik utoqqarnillu – tassaanngaannartumik, anigorsinnaanngisamik nappaateqalersunik aamma timikkut tarnikkulluunniit nappaatilinnik – katsorsaanissamik ilinniartinneqartarput. Peqqissaasunngorniarfik suliffiuvoq inuit pillugit sulinissamut soqutiginarluinnartunillu suliaqarnissamut periarfissaqarfiulluartoq. Tamatuma saniatigut Peqqissaasunngorniarfik nunanut allanukarnissamut periarfissaqarluartitsivoq – ilinniarnerup nalaani aammattaaq peqqissaasutut inersimagaanni. Ilinniagaq aaqqissuussaavoq Kalaallit Nunaanni peqqinnissaqarfinni sullitavut peqatigalugit. Peqqissaanermi bachelorinngorniarneq periarfissanik assigiinngitsorpassuarnik ammaassiviuvoq. Peqqissaasut ilarpassui napparsimmavinni peqqissaavinnilu sulisarput, napparsimasunik peqqissaasarput, nakorsaatinik tunniussisarlutik katsorsaanissanillu pilersaarusiortarlutik. Aammali peqqissaasut ilinniarsimasut peqqissuseq tamatigoortoq pillugu paasissutissiinermik, ilinniartitsinermik allarpassuarnillu suliaqarsinnaapput. Peqqissaasut suliaat tamatigoortorujussuuvoq suliaq pillugu ilisimasanik inuttullu pissuserisanik atuiffiulluarluni. TEOLOGII Kristumiussutsip qanoq pilernera, qanoq ineriartorsimanera ullumikkullu inuiaqatigiinni kalaallini qanoq inissisimanera soqutigisaraajuk? Apeqqu ilaatigut taakku Teologiimi bachelorinngorniarfimmi sammineqartarput. Teologiimi ilinniartutut kristumiussutsip aallaavia, oqaluttuarisaanera ullumikkullu ineriartornera pillugit ilinniassaatit. Taamaalillutit namminersorlutit piukkunnarsisimallutillu kristumiut ileqqutoqaannik ullumikkut isiginnittaatsinik aallaaveqarlutit isummerfiginnissinnaallutillu aallutaqarsinnaavutit. Teologiimi bachelorinngorniarfik Kalaallit Nunaanni ilagiinni palasinngornissamut periarfissaqalissutigissavat Kalaallit Nunaanni Ilagiinniittunut isumaqatigiissuteqarnikkut pastoralteologiimi pikkorissarneq qaammatinik arfinilinnik sivisussuseqartoq ilinniakkannut tapertaritikkukku. Ikittunnguit aamma atorfinittarput suliaqarfinni allani pingaartumillu isumaginninnermut tunngasunik, ilinniartitsinermik pisortaqarfinnillu attaveqatigiinnermik peqatigiiffinniluunniit privatinit pigineqartuni suliaqartarlutik. www.uni.gl 21
22 Publizr Home